用心照顧，in知！
華語寫「蒔花植草」，講種花草是修養，嘛像咧養飼囡仔仝款，干焦沃水、下肥，花草無一定就會生甲茂茂。人有百百款，逐種花草特性嘛無相siāng，愛研究才飼會媠。有的花草愛曝日，日頭予in規欉發甲青翠生光；有的較愛生佇蔭裡，袂當曝傷濟，一屑屑仔日花仔就好。
這兩欉若花的『落地生根』、『多肉』，其實是學校的牆圍仔邊抾的，毋知啥人無愛飼抨㧒捔，賰兩支「骨」佮一片細細片仔的葉仔爾爾。囥水檯頂飼咧飼咧，上網搜揣資料，研究in的性質，沃水、下肥的鋩角。一工一工沓沓仔來，拄開始敢若看袂出來in咧大。逐工洗手、洗碗的時，順紲共欣賞一下，in發穎生葉，一葉一葉鬥起來，毋知當時變成「兩蕊花」的！誠實的，用心共疼惜，in知！
我共翕落來做紀念，相嘛囥踮面冊標頭，欲提醒家己，粒積會發揮無限的力量；用心對待，疼惜每一个有緣來到身軀邊的生命。
