觀人生-阿媽的動物園 細漢時的台語

細漢我攏綴序大人綴牢牢，in台語人，我就若浸佇「台語的海」裡，想來是真幸福。

阿媽佇厝後的花埕邊起豬牢飼豬，嘛有雞牢通飼雞仔鳥仔，我會綴阿媽巡雞岫內的雞卵。厝邊的阿婆來開講，我就聽i講按怎共家禽家畜飼予gâu大閣會肥朒朒。干焦有一項伊無愛予我綴-豬母生囝。伊講我相虎，若是佇邊仔看，會害著豬仔囝。我彼時細罔細，頭殼誠清楚，我知影阿媽嘛相虎，就「共伊抗議」，伊嘛無法度「反駁」，干焦叫我兜彼隻牧羊犬顧佇花埕，我袂使倚過去。

豬仔囝出世，就會當看矣。一水tsi̍t-tsuí差不多有十外隻，逐隻攏粉粉幼幼，一隻一隻kheh(甲夾)佇豬母的腹肚邊食奶，彼是世間上媠的景象。

豬牢

細漢時囡仔流行日本式的外衫，敢若kimono，查埔囡仔穿嘛好看。衫仔料身真好，大漢的穿過，傳予細漢的穿。彼領紅角格仔的我嘛穿過，傳予兩个小妹，才閣換小弟穿。

阮兩个小弟和阿媽飼的豬仔囝做伙翕相。In後壁就是庄跤所在四常看著的低厝，磚仔鞏的，外壁本成是用稻草桿kuáinn切幼幼濫塗抹，後來攏閣加抹紅毛塗。

規水tsuí豬仔囝共飼料槽圍牢牢，顧食。

兔仔

阮有飼兔仔，阿媽會去台糖的甘蔗園邊割草做飼料，攏無料的，愛人工騎跤踏車去割就有影。徛兔籠仔邊，青草仔味摻兔仔味衝tshìng過來。講兔仔味是較好聽，其實大部分就是兔仔屎的味。雖罔in食草，一粒一粒的屎主要是草的纖維，鼻著嘛是䆀味，袂愛。

彼隻白兔目睭敢若透明的紅玻璃珠仔，咖啡色的彼隻目睭煞是深深深的咖啡烏色。便若徛籠仔邊，我上愛注意in的目睭，閣看in的鼻仔咧喘氣，蟯ngia̍uh無停的。

觀人生-阿媽炒米粉 細漢時的台語

        細漢我攏綴序大人綴牢牢，綴阿公阿媽去田裡，綴阿叔去溪邊釣魚仔。in台語人，我就若浸佇「台語的海」裡，想來是真幸福。

       年仔節仔，阿媽佇灶跤踏出踏入，無閒咧款食食。伊會挨粿漿來做鹹甜佮粿菜頭粿、渧水過的粿粞用來挲圓仔，烰一大鼎圓仔湯。濟濟的活動我攏綴有著。灶跤的灶燃柴的，我對捌代誌開始就綴咧學㧒柴入灶燃滾水。燃煞，灶裡的柴㷮會使用來炰番薯。擲番薯入灶空，用火夾挓柴㷮，共番薯規粒埋入去，就賰耐心這項工夫。現代家庭的灶跤真現代化，干焦有gah-suh爐，若欲享受炰食食的趣味，只好去塗窯場炕塗窯。

        阮是大家口，人濟好煮食，所以阿媽上捷用大鼎炒麵佮米粉。代先，芡芳的佐料愛攢予齊，絞肉、蝦、豬油、紅蔥仔酥，閣有胡椒五香。冰箱彼坩豬油，是阿媽家己買白豬肉掛皮來炸tsuànn的。古早人較抾拾，炸過的豬肉賰豬肉粕仔嘛留咧食𨑨迌，雖罔粕粕，哺著講芳芳。頭擺，我看彼敢若油肭肭，共咬一喙食看覓，(食著)有一个羶，我遮爾袂揀食的都無啥愛。

        等鼎熱，用煎匙挖一大塊豬油，入鼎抐抐予溶，隨共絞肉倒入去芡芳，蝦卑、紅蔥仔酥閣倒入去做伙抐，免偌久就規灶跤芳貢貢，貢貢芳。鹽濫落去，阿媽閣共味素佮胡椒五香撒咧撒咧，炒兩下就會使先khat(舌斗)起來囥。我徛灶邊儘等就等這味，相這大phiat(石匹)的佐料，指頭仔連鞭就欲伸伸出來。蝦卑有油煏過，鹹芳鹹芳閣脆脆，蝦殼佮蝦肉含豬油含甲飽滇飽滇。講嘛奇，袂愛豬肉粕仔，這款豬油蝦卑哺著嘛全全油，我煞愛食甲，拈袂煞。這味四秀仔罕得食著，愛趁這个機會拚勢拈，那偷偷仔䀐看阿媽會來唸袂。我逐擺攏足想欲叫阿媽專工煏一phiat(石匹)仔予我食予kà-liāng。

        大人無閒𩑾𩑾，囡仔閒閒綴咧罔看。鼎裡閣油油油，共泡好的米粉倒入去kō油，抐--幾下仔，紲落去佐料嘛入鼎做伙拌，那搜那抐，煎匙磨鼎siang-siang-siang，阿媽拌甲是大粒汗細粒汗，一大鼎欲拌予齊勻靠技術。

        大坩米粉炒好，喝逐家倚來khat(舌斗)。大大細細那食，那喝燒那歕風，阮相爭呵咾阿媽炒的米粉上好食。共伊褒一下，後擺毋才閣有好食物通捽。