下晡4：30轉來，那彈鋼琴那和厝裡的人開講，開始愛睏愛睏，想講眯一下仔。這時和我仝款攏咧練身體的教練同學，敲messager來欲開講，就半䖙咧眠床和伊講káng。伊下港人，這陣開始想著共台語抾轉來，欲和我練對話。伊叫我老師，電話中講欲佮專業台語老師講話會緊張呢！我聽著煞愛笑。
阮兩个久久才會通電話，毋過感情攏袂散。普通時干焦看面冊、拄著仔寫line咧“聯絡”感情。
這个文藻的同窗蹛高雄。畢業本成佇外國公司做貿易，閣家己出來佇厝做西班牙、義大利的白鐵仔(不鏽鋼)的生理，靠電話連絡買賣就做會成。雖罔趁大錢，毋過無暝無日，終其尾身體煞袂堪得。有一工，伊無想欲閤過趁錢予醫生的生活，家己揣教練開始練，感覺趣味，想欲幫贊閣較濟人，就家己進修專業智識，做健身教練。伊親身落去設計，共厝的店面改做健身房，沓沓仔買，這幾年設備那來那齊。同窗大部分收年歲較大的學生，𤆬in學飲食智識，利用營養閣清氣的食食，身材調養甲媠媠媠，共身體練甲勇kia̍k-kia̍k。這馬連in阿母攏來做學員，母仔囝兩个做伙練，好好仔食，好好仔練，愈來愈康健。
阮兩个捌專工坐車去桃園館長的健身場練，伊教我技巧。我line首頁這張相就是伊翕的，實際是阮兩个同齊入鏡頭。有這款好姊妹仔伴，我真榮幸，感覺這世人有夠價值！久久才會通一擺電話，感情猶是攏袂散，永遠遐爾好。我共部落格的台語學習資源貼予伊，會當慢慢仔學。
開講煞伊閣寫一句話來：「與君一席話，勝讀十年書」，我看著感動甲，知影家己佇這个世間嘛是有少少的貢獻。這幾年家己認真學習佮生活，一直進步，共好的分享出去，我的性命若花園，花開甲媠媠媠，花芳隨風四界送，滿園的清芳，上幸福的是我。
