觀花-苦楝舅

苦楝舅

拄才出門去買菜，經過萬囍(阮艋舺名聲上敨的『豪宅』)，外圍的苦楝舅Khóo-līng-kū張咧大開，這款樹仔，每年的十月上影目。這時大開，若親像咧祝賀國家的生日。

樹身大大欉，花煞幼麵麵，風吹來，隨落一陣黃金雨，花蕊恬恬仔飛落來，作陣鋪佇塗跤恬恬仔媠。我停落來翕相，想講這應該就親像佛經內面寫的金沙鋪地的景緻。

規葩規葩的花，開甲滿樹椏。日頭光一下照，金光閃閃。敦化南路中央的人行道嘛有種規排的。

寒人的苦楝舅葉仔落落地落甲光光，賰大大細細的椏。這號樹木春夏秋冬攏有特色。

#

苦楝舅=華語名台灣欒樹，十月開花，規樹頂攏一串一串的金黃色。樹身定有『姬紅椿象』踮遐趖，密密是，紅phànn-phànn真醒目，看著有淡薄仔驚人，毋閣in是對人是無害無毒的。

是按怎『臺灣欒樹』叫做「苦楝舅」？臺語若物件的名加「-舅」，有看起來真sio-siāng的意思。詳細比就知，「苦楝舅」佮苦楝仔的葉有影欲仝仔欲仝。

做比較：第一張是苦楝仔，第二張是苦楝舅。

苦楝仔=華語的苦楝樹，春天開紫色小花。花串在春雨中，充滿朦朧美。

臧振華（2005）。南島民族植物文化。台東市：國立台灣史前博物館。

李麗雲等編（2009）。卑南族的家與植物。台東市：國立台灣史前博物館。