鹿仔樹(構樹)
專工走來學校揣鹿仔樹翕相，欲予恁看。其實滿四界攏有，毋過咱普通時袂去要意。
自強樓這箍le̍h仔就足濟。
自強樓peh樓梯到二樓，花檯頂這欉鹿仔樹逐工攏咧迎接你。日光透過大大葉的葉仔照落來，拄仔好變成天然的綠閘屏，這个樓梯口就有青翠的光。閣較遠的榕仔頂，詳細看！有一隻暗光鳥(黑冠麻鷺)歇佇遐。這陣咧霎雨毛仔，溼溼冷冷，伊敢若袂要意。
莫怪叫做『先軀植物』，別種植物猶未來，鹿仔樹會做先鋒來。自強樓邊彼塊空地的牆圍仔邊，就發幾若欉鹿仔樹，比其他的花草閣較青翠大欉。
網球場牆圍仔邊這欉幾若年矣，是母的，注意看！有結果子。青色的是母的球型花，變柑仔色就會使食。青苔仔、厝鳥仔、白頭鵠仔上捷來享受遮的甜果子。人通常毋知，嘛袂來挽，大出的時，樹仔跤落甲滿滿是。恁中晝若對網球場這个門出去食晝，行過遮會記得攑頭看一下。鹿仔樹普通攏是三月才開花，這陣網球場這欉閣有母花，實在稀奇。
鹿仔樹母花圓圓，若一粒球(『頭狀花序』)、公花長長(『柔荑花序』)，桑材嘛是仝款。徐瑞仙有兩篇文章寫新竹高峰植物園的鹿仔樹，伊寫講看過公花當開，會放送花粉，若像有人噗薰咧歕煙，煙一圈一圈飛出來，一這款新奇的情景，愛都合too-ha̍p才拄會著。
我揣著矣！先看錄影。
鹿仔樹普通攏是三月才開花，這陣會網球場這欉閣有母花，實在稀奇。
網球場、林家焦麵對面彼棟紅毛塗建築嘛有，厝頂彼欉有夠大欉，樹椏對厝頂伸落來。
彼棟敢若無牆橛tshiûnn-kue̍h/半牆仔puànn-tshiûnn-á/城堞siânn-tia̍p(女兒牆)。
遮的桑材翕來佮鹿仔樹做葉仔的對比。
桑材和鹿仔樹仝科，葉仔攏有「多變」的特色，仝一欉(tsâng)有可能生無仝形的葉仔。
桑材嘛是仝款
鹿仔樹佮人
鹿仔樹的纖維和人的生活連結閣不止仔濟：
1.做衫、做服飾ho̍k-sik
楮 《韓詩外傳》卷一：「原憲楮冠黎杖而應門。」)
樹皮衫tapa, bark cloth
找回樹皮布的文化榮耀──都蘭耆老沈太木的傳承故事
東加王國樹皮衣，花紋內容包含東加社會重視的動物、植物以及國徽
3.紙票： 所以叫做『鈔票樹』
4.飼鹿仔： 所以叫做鹿仔樹。
5.奶樹：樹汁做染料
延伸材料：
二二八國家紀念館(原臺灣教育會館)頭前的雀榕：
https://g.co/kgs/GqJ2iM
佮構樹仝科，嘛是做樹皮衫的材料。
雀榕：大葉榕、赤榕、山榕、紅肉榕、鳥榕、鳥屎榕、筆管樹(瓊)；Yono(鄒語)
‧科名： 桑科(Moraceae)榕屬(Ficus)
鳥榕(tsiáu-tshîng)真正佮鹿仔樹仝科，鹿仔樹是桑科(Moraceae)構樹屬(Broussonetia)。
「鹿仔樹」
對頂學期台語課介紹「鹿仔樹」予學生in，特別走去校園四界翕相，囥部落格。到今，這欉樹仔閣一直佇生活中出現！寒假的2023台北國際書展盛會開專題演講，這擺的模擬會考閱讀題有出，這馬閣佇基隆海洋科教館展覽#台灣是世界的台灣。
有學生看我整理的資料，落尾寫來討論。這欉樹仔，毋但佇土地做先軀，我的紹介嘛成做先軀，佇學生的心內墊一粒子，引𤆬in用多元的角度看見臺灣，智覺這塊土地是偌爾仔寶貴，有偌爾仔媠。
這欉樹仔真正是寶，毋知閣有偌濟祕密等人類去研究！
