昨昏欲暗仔，佇街仔路看著西爿的天邊有一搭水蜜桃粉紅，感覺這个黃昏的夕陽一定真好看，趕緊三步做二步走轉去。天色的變化攏算秒的，定著愛趕緊。到厝隨鎖匙捎咧，傱去樓尾開門，對窗仔peh出去鐵棟頂。
真正予我臆著！西爿的天，日頭光拄咧「搬大戲」。好天時的黃昏，逐工攏有無仝的景緻，有時滿天紅霞，有時夕陽光颺颺，像這種金光閃閃，瑞氣千條的，無定定有，人閣愛拄好有佇足懸的所在，才看會著。
氣象局長鄭明典講這叫做「霞光」，媠罔媠，其實代表空氣品質無偌好。另外閣有條件，就是遠遠的所在拄好有雲，抑是大形的遮蔽物(jia-pè-bu̍t)閘著日頭光，才造成一條一條的光線。
倒手爿閣較過來一屑仔，這塊雲嘛予霞光照著，順紲翕落來。後來我才知影彼塊是『雷雨胞』，下跤雷公爍爁，凡勢閣狂風暴雨。
阮兜四周圍有大樓，所以干焦翕著遮的光景，毋閣有通共這種奇妙的景緻留落來，感覺真滿足矣。彼工下昏暗隨佇面冊看著面友人鋪文，是仝彼時佇別位翕的，用專業相機，角度閣掠了有媠的相片，精彩萬分。原來「追雲、追日光」的人有影袂少，而且in真分張，有好的作品攏會鋪來予逐个迷眾做伙欣賞。
