10：00去銀行鑢口座，整理寄金簿仔，兩間銀行仝條路，相對相sio tuì-siòng，過路就到。上班日閣無啥人客，真緊就辦好。若無要緊的金融代，千萬毋通過年前的跤兜去銀行，上班時間嘛仝款，規間實thóng-thóng，人插插插，抽號碼等看覓，絕對會等甲斑鴿吼。
來聽斑鴿吼--久久久
2023年2月10日 星期五
觀花-阮兜花園的西瓜仔囝
阮兜花園的西瓜仔囝
阮囝攏是台北出世、大漢的，雖罔in細漢的時，逐禮拜六攏𤆬咧四界看，過年過節閣𤆬轉去庄跤蹛幾工，毋閣和我這个耍田塗耍甲大的阿母比起來，in是都市倯。
為著無想欲佇作文看著「阮peh去樹頂挽西瓜」這種文句，阮專工買西瓜子來叫in墊。空中花園無偌大，干焦有花坩，毋閣算是有塗肉通「種作」。
觀花-臺灣烏心石
臺灣烏心石--堅心的好材tsâi
牛油質的花芳閣優雅，看著親像細版的玉蘭花。仝科的！
真正像台語課本寫的，「風吹芳味四界送」！
借唐代杜甫的詩來比花芳。毋若雨水，冬尾的花嘛是真大範，不時有花芳綴風飛送。
人才lâng-tsâi
柴料tshâ-liāu
後記：
最近校園的台灣烏心石綻放了滿樹芳華，低調優雅。樹心色深，堅硬如石，名為烏心，位列台灣一級木。
查資料寫了文章，想到一個意義雙關的文題：臺灣烏心石--堅心的好材tsâi
一天一天，烏心石樹緩慢生長，無論風雨晴日，有朝一日必定長成優良木材。
一個人堅定心志，一如此樹，栽培自己努力向上，也許未來行路偶有艱辛，但堅信的力量會讓人堅持下去，成為好人材，細聲潤物，對世界有所貢獻。
觀花-彼欉敢是檨仔？ 之二 答案來矣
早起去銀行進前，佇校園踅一輾，共逐種植粅攏翕一遍，看著春天咧欲來矣！
這幾張相是校園的土檨仔，這陣當咧暴穎，穎裡閣拍莓(花苞)。
想起恁校園邊門仔彼欉樹仔，幾工前猶咧臆，無確定是台東漆仔樹抑是檨仔樹。這馬知矣，百面是檨仔欉，因為現此時暴的穎和阮校園土檨仔的仝款。
我咧臆恁的是愛文(蘋果檨)彼款品種，伊結的果子袂像土檨仔遮厚，所以人較袂注意著。
彼日我專工去邊門仔翕的，和頂面的土檨仔相比並pí-phīng--一下就知，這百面是檨仔。
觀人生--練心的功夫
2014年四月十五開始運動、重量訓練到今，無論透風落雨，我毋捌停過。遐爾重要的變化，彼時開始行的人生路攏完全無仝，所以我閣共四月十五看做另外一个生日。
訓練的每一个動作，甚至是每一分、一秒，攏有深深的學問。一路體會著的，毋但是肌肉、筋肉的強度增加，閣有敏捷度佮瞬間的爆發力。有幾若擺，拄著較緊急的狀況，身體即時的反應，我有通保持平安，閃過著傷的處境，按呢，普通時練甲流汗糝滴就有夠著。
逐擺喘甲、痠甲想欲停落來，雖罔閣賰幾秒，煞感覺一秒若一分鐘遐爾久，這時就愛鼓勵家己勇敢，堅持做完。
身體以外，上奧妙的是心的訓練。毋是干焦咧運動，我共家己定位做『習武之人』。
閣換一个角度，咱寫毛筆書法、學台語朗讀佮音字、練詞彙luī拼音書寫的速度，其實攏是咧練心。
這篇是我教練的教練何大安教授寫的【習慣的力量】，他去國外取經，研究運動科學。這是『習武之人』深刻的體會，有閒慢慢仔讀。
訂閱：
文章 (Atom)