遠遠看雲尪，有的大範，有的古錐，加一點仔想像力，in連鞭變做狗仔貓仔，另外嘛有像人的，愈看愈趣味。彼就是華語講的『積雲』（Cumulus），若是佇熱天的下晡，大氣的溼度佮溫度閣配合，定著會發展做真大龐的雲尪-『積雨雲』(Cumulonimbus)。
頂禮拜綴查某囝參加伊的畢業旅行，遊覽車對嘉義出發，欲駛去劍湖山遊樂園。遠遠我看著山頂的大雲尪，阮就是欲去雲尪罩咧彼粒山的飯店。
規下晡一路攏好天，熱翕翕，我那翕相那欣賞彼部雲尪。雲尪頂懸發展到一个懸度，開始向四箍圍延伸。車那駛那倚近山的時，一爿的天色猶閣透藍，倚雲彼爿煞殕殕烏烏，天際線是一大片藍色透濫黃hooh-仔黃hooh的色彩。雲堆予日頭光微微仔透過，親像天頂一塊綿綿的冰。
駛到雲的下跤，日頭走去覕，規个烏陰，閣較過彼爿的山早就予雨水沖hōo-tsuí-tshiâng崁咧矣。去到飯店，車門都猶袂開，就聽著車頂叮叮tiang-tiang，紲落來phi-phi-phia̍k-phia̍k，若像作穡人搣一大把豆仔掖落來，開始摔大雨矣！
即時的山雨，兼雷公爍爁，逐家落車一手捾行李，一手攑雨傘，三步做兩步傱去飯店大門，短短二三公尺爾爾，身軀隨沃甲澹澹。
古錐的雲尪下跤，是雷公爍爁佮雨水沖呢！
沒有留言:
張貼留言