觀花-長壽花

雖罔真愛去踅花市，毋過我罕得咧買花栽。我花園的花，攏是去佮同事遮討一節遐挽寡子、甚至干焦捻一葉，就會使硩佇塗裡等發根，暴新穎，生做新欉。

這欉長壽花嘛是，兩年前，毋知啥人擲佇水檯邊，幾若工了後，葉仔(就按呢)tsua̋n蔫蔫脯脯去。共抾轉來插枝硩塗，種兩年，這馬咧拍莓(phah-m̂)矣！

這款花拍莓真正常，毋過欲像按拍甲枇枇枇，就愛技術囉！網路「海海」，查資料就知，春夏秋冬有無仝的顧法。

毋知是啥物色水的，真期待，耐心等著知。

長壽花，名真吉祥好意，花色濟，閣拄好佇舊曆年彼个跤兜開，花期長長長，買一盆對過年媠甲欲暑假，擋幾若個月，所以過年過節真時行。有花瓣bān干焦一輾的，嘛有培養出重疊花瓣的，規蕊圓圓，看起來親像牡丹花bóo-tan-hue遐富貴大範tuā-pān。

拍莓：結花苞

開獎！

相遮濟個月，花莓都花莓，猶未開。今仔日共花坩小踅過來，規簇的花莓中央藏一蕊大開的，是罕見的牛奶油黃，花瓣邊閣染薄薄的粉紅色。開花才知，阮這幾欉叫做綠巴黎。

花型像富貴的牡丹，嘛有成玫瑰花，舊曆過年欲到矣，這馬開花，就是上好的祝福，做人做事會圓滿，事事項項照意願！