觀花-苦楝仔樹

苦楝仔，實在是好樹木，毋過伊予人共號的名彼字「苦」害著，因為人對「艱苦、死亡」這款字較無愛，有禁忌。

是按怎『臺灣欒樹』叫做「苦楝舅」？臺語若物件的名加「-舅」，有看起來真sio-siāng的意思。詳細比就知，「苦楝舅」佮苦楝仔的葉有影欲仝仔欲仝。

苦楝仔的柴身實櫼，是好柴，適合做船。雖罔花細細蕊，幼麵麵，好佳哉是集中生做規大葩，才顯目。春天的時，苦楝仔敢若欲共規年粒積的做一擺展出來，逐椏攏生一葩，一葩一葩開甲滿滿滿。大部phō墨青色插深深的紫色閣真鬥搭tàu-tah，規排佇路邊tshāi咧，徛thîng-thîng，真熱情。春天的霎霎仔雨雺裡，追花的人上愛翕這種紫色的春霧。

毋若春天放送茄仔色的花霧，紲落來的夏、秋兩的季節，in嘛欲一路一直媠落去。熱天時，結青青的果，欲佇秋天轉黃。這種果仔『紅喙黑鵯』上愛食。我定看in 規陣飛來樹椏裡，那耍那唱歌，耍甲枵矣，攑頭喙開開就食會著，遮的鳥仔日子過甲真心爽敢毋是？

苦楝仔的樹皮有必痕，恬恬仔詳細共欣賞，其實有一種規則佮花樣(pattern)。阮遮的空氣可能抑閣袂䆀，有生一寡『地衣』佮青苔tshenn-thî。

臧振華（2005）。南島民族植物文化。台東市：國立台灣史前博物館。

李麗雲等編（2009）。卑南族的家與植物。台東市：國立台灣史前博物館。