中晝無意中搪著的小朋友！
中晝共學生的宿題款好，拄咧食便當，已經食飽四界踅的阿綸走來討救兵，講樓頂的走廊有一隻鳥仔覆佇塗跤，青色的，毋知名。我食飽隨綴伊去看。
「喔！予我臆著！這『五色鳥』呢！台語名是花仔和尚。拄才12點下課，我影著伊佇樹椏遐，閣報同學看。這陣伊哪會跔ku佇塗跤？」我那看塗跤那講予阿綸聽。
「老師，伊拄才覆咧，袂振袂動呢，這馬會跔咧算是好矣。」阿綸的聲聽起來歡喜歡喜。
我跍khû--落去，倚去共看，出聲想欲共安搭，講阮袂害伊。花仔和尚掠我金金相，無飛走，干焦繼續跔咧。
其實我無想欲伸手摸伊，驚共拍生驚，而且我真清氣相，普通時袂凊彩摸動物。若是這隻鳥仔破病，我會隨連絡動保處來救伊。
花仔和尚敢若攏佇樹仔尾較濟，難得遮爾倚近呢！我那觀察那共翕相，才翕三張爾，伊突tu̍t然間徛起來，siu̍h一下飛無去。
真好呢！伊平安無事，阮放心矣。我共阿綸呵咾：「好佳哉你來叫我，一个動作救著一隻鳥仔呢！若無咱來共刺激，無定著伊就一直跔佇遮閣昏死去。」
「一工行一善」，阿綸一直是真貼心的囡仔。
沒有留言:
張貼留言