觀花-挽野菜 細漢時的台語

拄才面友鋪挽野菜的文，閣有貼相。春天挽野菜正當時啦！

若講著「挽野生的菜」這个主題。佇部落格大概閣會當寫出10篇文以上。田庄生活四季攏充滿活力佮趣味。

部落格貼家己翕相才袂hőng告，有閒四界so̍h-so̍h咧就揣會著，翕袂煞。

烏子仔菜：這款菜華語是『龍葵』，閣叫做烏甜仔，四界發，校園嘛誠濟。屬茄科的，所以千萬毋通當食生的(猶袂開始變熟的烏柿柑仔蜜嘛仝款，有生物鹼)，嘛毋通一下食傷濟。

烏子仔菜無論濫薑絲煮湯、抑是和罐頭魚仔煮菜糜攏真味，哺著苦苦，吞落去隨回甘，薄薄的甘甜滋味會對嚨喉勻勻仔升起來。

原住民嘛會挽來煮食。