中晝經過邊門仔，彼欉樹身掛牌仔寫『芒果樹』，你講毋捌看過果子落落來。拄才心肝頭嚓一下，雄雄想著彼欉樹仔，敢有可能是『台東漆樹』？『台東漆樹』和『芒果樹』拄好仝款，攏屬「漆樹科」。
你閣講：「有印象彼欉捌開白色的花。記無啥清楚啦，學校敢若真濟花攏白色的。去網路搜揣資料，若正港是『台東漆樹』，目前應該是咧結果，欲看伊開花可能愛等明年囉。」
「白色的花喔！閣真正可能是『台東漆樹』！檨仔樹濟濟的品種，開的花攏毋是白色的，較倚金黃色。」
聽著開白色的花，今仔日閣注意著彼欉樹仔發新芽，我自按呢緊去網路搜揣相片來比看覓，對看葉仔、樹椏、樹皮的花草有成無。我學植物的知識就是按「亂亂看亂亂查」來的。久來，有時佇教科書、教學海報，甚至是圖書館的冊我就會看著貼毋著的植物圖/相片，有閒會寫信去出版社共反應（這敢就是叫做『踢館』honn？哈哈）。
細漢定聽大人講「檨仔有“毒”」，哪會逐家閣愛食甲？有的人吃甲過敏，予檨仔樹和葉仔的汁滴著，皮膚會癢甲抓破皮，原來是檨仔本成pún-tsiânn就屬漆樹科，閣真正“有毒”！
查『台東漆樹』，516台灣現有漆樹科植物有遮的，其中特別注意著仝屬「漆樹科」的鹽膚木。
【香料QA#55】鹽膚木 sumac｜誰說台灣沒有香料？｜來自台灣山林的植物
針對一個關鍵字、主題，深深共挖入去，看見新的天地
昨天查九芎kiú-kiong，看著退休主任莊溪四界探訪、翕相，整理出詳細的植物資料庫，伊的網站有注意著植物學名的格式，正港非常細膩佮頂真。
芭樂、九芎、紫薇來比並，in共同的特色是樹身光滑，相siâng相siâng，若猶未開花，欲按怎分別？
網頁講九芎是『長尾水青蛾』蟲仔的食草，我隨想起這種端的的蛾仔。本身自細漢看著蟲就驚惶，尤其是毛tshia-tshia、刺giâ-giâ的刺毛蟲，驚甲連冊的相都毋敢摸，所以毋敢去讀蟲豸系抑是植物學系(尤其拄著病蟲害這科，穩當袂及格的！課本都毋敢摸，欲哪會反開來讀？)蟲罔驚，毋過蝴蝶、臭蛾仔我閣真愛欣,，長尾水青蛾是其中一種，看照片即知。伊外型線條簡單束結，翼的絲絨水青色精巧，下翼閣愈特別，有兩條微微仔卷咧的尾帶，悠悠然若絲布，幼秀閣標致。 前年𤆬囡仔去參加馬術比賽，佇東勢住民宿彼兩工，翕很多蛾類、蟲豸佮蜘蛛網的相片。頭暝主人捌講in遮暗頭仔定khuàinn『長尾水青蛾』來，彼暗我沒等著，有淡薄仔無彩。「按呢就是講後遍閣有通去的意思啦！」落尾我家己暗暗仔想。
和蝴蝶郵票
沒有留言:
張貼留言